Disney 2013 collection for Boys & Girls from Oriflame .. مجموعة ديزنى 2013 للأولاد والبنات من اوريفليم

حبيت موضوع النهاردة يكون مختلف وفنفس الوقت مفيد للأمهات ، المجموعة اللى هتكلم عنها النهاردة هى مجموعة ديزنى 2013 للأولاد والبنات .. فيه مجموعات كتيرة للأطفال فى اوريفلام لكن دى اللى أنا جربتها عشان كده حبيت أشارككم تجربتى معاها.

بداية .. المجموعة مكونة من 3 منتجات للبنات و 3 منتجات للولاد .. منتجات البنات هى :- أو دو تواليت ، شامبو ، صابونة .. ومنتجات الولاد هى :- أو دو تواليت ، غسول للشعر والجسم ، صابونة.

بشكل عام المجموعتين شكلهم عجبنى فى الكتالوج ولما إشتريتهم ، مجموعة البنات مرسوم علها البرنسيس اريل المشهورة فى شخصيات ديزنى وهى شخصية عروس البحر ومجموعة الأولاد مرسوم عليها كارتون البلانز أو الطائرات وهوه كمان من أشهر وآخر إبداعات ديزنى ، رسومات الشخصيات المحببة للأطفال ليها دور كبير فى إن الأطفال يحبوا المنتج لإرتباطه بشخصيات هما بيحبوها وبيتابعوا أفلامها ، وإختيار الشخصيتين دول تحديداً كان إختيار موفق من المبدعين فى الشركة.

ننتقل لتقييمى للمنتجات بعد إستخدامها وهبدأ بمجموعة البنات ،،

1. Disney 2013 Girls EDT .. Code "30023" :-

شكل المنتج جميل ولونه كمان ، العبوة حجمها 100 مل وده حجم كبير ويعيش مع البنت لمدة طويلة ، وريحته تجنن بمعنى الكلمة ، ريحته على شمام وفريش ومنعشة وفعلا بنوتاتى خالص ، رقيقة جداً ومنعشة ومناسبة لفصل الصيف  ، عيبه الوحيد إنه مش ثابت ولكن ده طبيعى لأنه أو دو تواليت وللأطفال فبالتالى مفيش مشكلة إن كل ماعطره يروح البنت تحط منه تانى.

2. Disney Princess 2013 Shampoo .. Code "26415" :-

العبوة جملة ومرسوم عليها البرنسيس أريل زى بقية المجموعة ، حجم العبوة 200 مل يعنى حجم متوسط وده أكتر حاجة عجبتنى فيها لأنها صغيرة نسبياً وسهلة جداً للتنقل ، باخدها معايا فى السفر وكمان فى تمرين السباحة أو فى الشاليه أو عامة لما البنت بتنزل البيسين أو البحر ، مبتاخدش مساحة فى الشنطة بتاعتى ، بالنسبة للمنتج نفسه هوه مرطب جداً للشعر ومناسب مع الشعر اللى فيه تشابك ، بشكل عام منتج جميل.

3. Disney 2013 Girls Soap Bar .. Code "26416" :-

منتج جميل رغم صغر حجمها "75 جرام" إلا إنها فعلا جميلة ، لونها تركواز فاتح وفيها لمعة جميلة جداً ، ريحتها زى البرفيوم بتاعها بالزبط على شمام ومنعشة جداً وهى على شكل صدفة وده برضه نقطة تميز للمبدعين فى الشركة بما إن بطلة المجموعة وهى البرنسيس أريل هى حورية بحر فصمموا الصابونة على شكل قوقعة أو صدفة ، يمكن دى أكتر حاجة فى المجموعة البنت طارت بيها لما إستخدمتها.

المجموعة التانية وهى مجموعة الأولاد ،،

1. Disney 2013 Boys EDT .. Code "30024" :-

شكل العبوة برضه جميل وولادى فعلاً ، برضه الحجم 100 مل ودى حاجة كويسة جداً ، ريحته ولادى جداً وذكورية ، لما تشميه فعلاً تحسى إنه عطر رجالى رغم إنه للأطفال ، تماماً كالسابق يعيبه فقط عدم الثبات ولكن دى مش مشكلة ، الولد طول اليوم ماشى بيه كل ما ريحته تروح بيستخدمه تانى وده دليل إنه حاز على إعجاب الطفل.

2. Disney Planes Hair & Body Wash .. Code "26417" :-

أكتر حاجة عجبتنى فى المنتج ده إنه 2*1 شامبو وشاور جيل ، هوه غسول للشعر والجسم وحجمه 200 مل يعنى برضه مناسب إنه يتحط فى شنطة البحر أو شنطة التمرين وكمان شنطة السفر ، ريحته حلوة زى العطر بتاعه وكمان بيدى لمعة حلوة أوى للشعر ، أنصحكم بتجربته لأولادكم.

3. Disney 2013 Boys Soap Bar .. Code "26853" :-

أخيراً وليس أخراً صابونة ديزنى للأولاد .. كمان تحسب للمبدعين فى اوريفليم تصميمها على شكل سحابة بما إن بطلة المجموعة هى الطائرات ، لونها سماوى رائع لكن حجمها صغير "75 جرام" ، ريحتها رائعة ورغوتها جميلة وعجبت الولد أوى.

بشكل عام مجموعة ديزنى 2013 عجبتنى كلها سواء للأولاد أو للبنات ، والشامبو كررت شراؤوه .. شامبو البنات وغسول الشعر والجسم للأولاد ، الإتنين إشتريتهم تانى لإنهم مهمين جداً فى الصيف عشان التمرينات والمصيف .. أنصح كل أم بتجربة المجموعتين مع أولادها وهتشوف بنفسها مدى فرحة أطفالها بكل منتج ومدى إعجابها هى شخصياً بجودة المنتجات.

لو عندكوا أى إقتراحات لأى مواضيع عايزينى أكتبها أو أى منتجات حابين إنى أكتب رأيى الشخصى فيها بعد تجربتها سيبولى تعليق بالمنتج اللى حابين تعرفوا عنوا أكتر ، وهشوفكوا قريب فى موضوع جديد بإذن الله.

The"10" Must Haves from Oriflame "Body Care" .. 10 منتجات لابد من شرائها من أوريفلام "العناية بالجسم"

تالت موضوع بإذن الله فى سلسلة مواضيع "Must Haves" هو عن منتجات العناية بالجسم ، أعتقد إنى فى الجزء ده بالتحديد ممكن أحتاج لأكتر من 10 منتجات ، زى مانتوا عارفين إن كل جزء فى الجسم بيحتاج لعدد من المنتجات للإهتمام به .. الإيدين ، القدمين ، مزيلات العرق ، السكرب والمرطبات لكل جزء وهكذا ، هحاول إن أنا أخليهم 10 منتجات قدر المستطاع وأتمنى إنها تكون مفيدة ليكوا إن شاء الله.

1. Silk Beauty White Glow APD .. Code "22714" :-

أنا بحب معظم مزيلات عرق أوريفلام ، غالباً بتكون روايحها حلوة ومنعشة والأهم بالنسبالى إنها بتكون ثابتة طول اليوم حتى مع الحركة والمجهود الكتير ، وبما إنى المفروض أختار واحد بس هنا عشان الموضوع فانا اخترت السيلك بيوتى وايت جلو لأنه هوه المفضل عندى إلى جانب مجموعة أكتفل اللى هتكلم عنها بالتفصيل فى موضوع تانى إن شاء الله ، بالنسبة للسيك بيوتى اللى بتكلم عنه دلوقتى ده المفضل عندى طول السنة ، بحب ريحته .. ناعمة ورقيقة جداً ولو انتى بتعانى من إسمرار فى منطقة تحت الإبط مع المواظبة على إستخدامه هتلاحظى التفتيح فى المنطقة دى ، ناعم جداً على البشرة ، بيجف بسرعة ومش بيلزق زى معظم الرول أون ، حماية من رائحة العرق 24 ساعة  ، يعنى منتج أكثر من رائع وخلانى أفكر إنى أجرب بقية مجموعة الوايت جلو من سيلك بيوتى.

2. Milk & Honey Gold Hand Cream .. Code "26447" :-

كريمى المفضل على الإطلاق من بن كل كريمات اليد من اوريفلام ، إبتداءاً من ريحته الرائعة لملمسه الناعم ، كريم غنى جداً ومع ذلك غير دهنى على الإطلاق ، حسيت بنعومته وتأثيره على بشرتى من أول إستخدام ، بعد إسبوع حسيت إن بشرة إدى بقت رطبة أكتر ، مقدرش أستغنى عنه رغم إنى بستخدم كريمات لليد كتير وهتكلم عنها بالتفصيل فى موضوع منفصل إن شاء الله ، لكن كريم الميلك اند هنى هو الأفضل بالنسبالى ، بحس بترطيبه وتغذيته مع ريحته الجميلة.

3. Foot File .. Code "9588" :-

يمكن ده من أقدم المنتجات فى اوريفليم على الإطلاق ، أنا عندى بقاله حوالى 9 سنين ولسه بستخدمه لحد النهاردة ، وده كان أول منتج أشتريه فحياتى من أوريفلام عشان كده هوه مميز عندى لإنه كان السبب فى إنى أشترى منتجات كتير بعد كده من الشركة لأنه عجبنى جداً ، ببساطة هوه جميل وسهل فى الإستخدام ، بعد ما تاخدى الشاور بتاعك نشفى رجلك بفوطة وافركيها بالمبرد خاصة الكعبين وهتلاقى الجلد المت بيتساقط ، بعد كده ادهنى قدمك بالكريم الخاص بيها والبسى شراب وتمتعى بالفرق والنعومة الرائعة.

4.Milk & Honey Gold Creamy Soap Bar .. Code "15571" :-

كالمعتاد من ميلك أند هنى ، صابونة ناعمة ورقيقة وضرورية فى روتينك الخاص بالجسم ، لو إنتى مبتفضليش إستخدام الشاور جيل فهيا أنسب صابونة أنا جربتها لحد الآن للجسم ، وإذا كنتى زيى بتحبى الشاور جيل أكتر لكن بتحتاجى فى أوقات كتير إنك تاخدى شاور سريع جداً فدى هتكون الخيار الأمثل ليكى ، رحتها ناعمة جداً ورقيقة زى بقية المجموعة ورغوتها غنية وأعتقد إنها مناسبة لجميع أنواع البشرة خاصة الجافة.

5. Tender Care .. Code "1276" :-

تانى ! أيون :D
فى الموضوع السابق كلمتكم عنه كمرطب فعال للشفايف  ، فى الموضوع ده هو مرطب فعال لأى جزء فى جسمك ، خاصة المناطق اللى غالباً بتعانى من خشونة أو جفاف زى الكعبين والكوعين ، عامل زى السحر ، من أول إستخدام بتحسى بنتيجته ، فيه بنات كتير بيشتكوا من صغر حجم العبوة لكن ده كريم مركز وقوى جداً يعنى نقطة واحدة منه كافية جداً للإستخدام فى منطقة كاملة زى القدم ، يعنى العبوة الصغيرة دى هتعيش معاكى لفترة طويلة ، وميزته إنه متوافر بروائح كتير ، بالنسبالى بحب أستخدم اللى بريحة الشيكولاتة للجسم واللى بريحة اللوز للشفايف ، بقية الروائح لذيذة بس حسب كل واحدة وروائحها المفضلة.

6. Nature Secrets Hand Gel With Anti-bacterial Extracts Tea Tree & Mandarin .. Code "23644" :-

الهاند جيل ده مش بشيله من شنطتى أبداً ، أنا جربت القديم قبله وعجبنى برضه وهوه تقريباً نفس تأثير ده لكن ده ريحته منعشة جداً ، غير لزج على الإطلاق فالبشرة بتمتصه فى ثوانى ، والعبوة 50 مل وبتعيش معاكى كتير حتى مع الإستخدام اليومى ، كمان حلو جداً للى معاها أطفال ، زى ما انتوا عارفين الأطفال دايماً بيبهدلوا إيديهم وفى الشارع مش دايماً هتلاقى أماكن تغسلى فيها إديهم وحتى المناديل المبللة مش بتنضف ولو نضفت فهى مش بتعقم ، فده هوه الحل الأمثل لإتساخ الأيدى خارج البيت .. أنصح كل الناس إنها تجربه.

7. Silk Beauty Shave Gel .. Code "22932" :-

منتج مميز من أوريفلام .. لو كنتى بتستخدمى مكنة الحلاقة فى إزالة الشعر من أى جزء فجسمك فده هوه المكمل المثالى لمكنة الحلاقة ، ومينفعش تزيلى الشعر بالموس من غيره ، ريحته جميلة والعبوة حجمها 150 مل فبتقعد لفترة طويلة معاكى ، طريقة إستخدامه سهلة وهى إنك بتبلى بشرتك بالميه وتوزعيه على المنطقة اللى هتزيلى منها الشعر وتحلقى بالطريقة المعتادة وبعد ماتخلصى إغسلى المنطقة الى تمت حلاقتها بماء فاتر وإستمتعى بالنعومة ، الجيل ده هيخليكى تستمتعى بعملية إزالة الشعر بسبب جمال ريحته المنعشة.

كده أنا انتهيت من 7 منتجات من أصل 10 المفروض يتضمنهم الموضوع .. لو الموضوع عجبكم وحابين إنى أكمله سيبولى تعليق ، لو كان فيه تفاعل وعجبكم الموضوع بإذن الله هكمله ولو عندكم أى مقترحات تانية لمواضيع تهمكم قولولى وأنا بإذن الله هعملها ، متنسوش تتابعوا بقية مواضيع المدونة والمتعلقة كلها بأوريفلام.

The"10" Must Haves from Oriflame "Skin Care" .. 10 منتجات لابد من شرائها من أوريفلام "العناية بالبشرة"

تانى موضوع فى سلسلة مواضيع "Must Haves" النهاردة هيكون عن منتجات العناية بالبشرة وده الجزء المفضل عندى شخصياً ، أهم منتجات لازم تكون عند أى بنت وسيدة هى منتجات العناية بالبشرة ، طول الوقت بحب أجرب منتجات جديدة للبشرة عشان أوصل للروتين المثالى المناسب لبشرتى .. يلا نبدأ ،،

1. Pure Nature Organic Alo Vera & Arnica 80% Pure Gel .. Code "20163" :-

الجيل ده أكتر من رائع ، منتج مميز جداً من أوريفلام ، ناعم جداً وريحته منعشة وكمان تأثيره على البشرة ممتاز بيديها إحساس بالبرودة رائع ، مناسب جداً للبشرة المجهدة بعد يوم عمل طول ، بعد الغسول والتونر إستخدميه كبديل لكريم البشرة ، كمان مناسب للإستخدام قبل المكياج بيخلى البشرة رطبة ومحتفظة بنعومتها بعد وضع المكياج ، كمان بستخدمه بعد ما بشيل المكياج لأن البشرة بتكون جافة شوية عن طبيعتها ، بستخدمه وفدقايق بحس إنى بشرتى رجعت لطبيعتها ، ممتاز للبشرة الدهنية لأنه مكون من 80% جيل وكمان يتماشى مع أى نوع بشرة تانى وده نادر لما يكون فيه منتج ينفع لمختلف أنواع البشرة ، أنا إستخدمته مع بقية مجموعة الصبار والأرنيكا وحبيت المجموعة كلها وهتكلم عنها بالتفصيل الممل فى موضوع لاحق بإذن الله.

2. Pure Nature Organic White Tea Extract Moisturising Gel Mask .. Code "16356" :-

أحب إن أنا أبدى إعجابى الشديد بالجيل ماسك ده ، إلى جانب إنى بحب الماسكات الطبيعية من أوريفلام .. الماسك ده تحديداً من مفضلاتى فى أوريفلام طول الوقت ، ريحته منعشة جداً ونفاذة وتحسسك بالصيف والإنتعاش ، ملمسه جيل رائع وبحس بالترطيب بمجرد ملامسته لبشرتى ، بعد يوم عمل طويل بحطه على بشرتى وأسترخى لمدة 10-15 دقيقة وبعدين أغسل بشرتى وأستمتع ببشرتى الناعمة المنتعشة ، كفيل بإنه يغير مودى بالكامل إلى الإسترخاء ، يختلف عن جل الصبار والأرنيكا فى إن ده لازم يتغسل بعد وضعه ب 10 دقائق بينما جيل الصبار والأرنيكا يستخدم كبديل للكريم أى يوضع ويترك على البشرة ، ويشترك معاه فى إنه مناسب لجميع أنواع البشرة من الدهنية والمركبة إلى العادية ، الجافة وشديدة الجفاف ، أنصح الجميع بتجربته.

3. Pure Nature Organic Tea Tree & Rosemary Purifying Soap Bar .. Code "23468" :-

فى أوقات كتير بفضل الصابون عن غسول البشرة ، الموضوع بيرجع للمود فى الآخر ، وأنا جربت عشرات الأنواع من الصابون فى اوريفلام ، الصابونة دى هى الأفضل على الإطلاق ! لونها أخضر شفاف رائع وريحتها منعشة وناعمة ، رغوتها غنية جداً وكمان حجمها 100 جم يعنى كبيرة مقارنة بصابون أوريفلام اللى غالباً بيكون 75 أو 50 جم ! المفترض إنها للبشرة الدهنية ولكن أنا بشرتى عادية ومناسبة جداً معايا يعنى مناسبة لأى نوع بشرة والأكيد للدهنية فى المقام الأول لأنها خالية من الزيوت ، خاصة إن فيها مواد منقية فعالة جداً وهتلاحظى الفرق بنفسك بعد إستخدامها لمدة 5 أيام ، هتحسى بفرق النقاء والنعومة فى بشرتك.

4. Milk & Honey Gold Eye Cream .. Code "25134" :-

تماماً كما السابق ، جربت أنواع مختلفة لكريمات العين من أوريفلام وبصراحة محبتش ولا واحد منهم ، يعنى كنت بستخدمهم بحكم إنى إشتريتهم وفجأة أصدرت أوريفليم كريم عن جديد من مجموعة ميلك آند هنى ، اللى هيا من مجموعاتى المفضلة فى الشركة وهكذا .. اشتريته .. جربته .. حبيته ! كريم غنى جداً زى بقية مجموعة ميلك اند هنى ، هو مش خاص بالهالات السوداء ولكنه بيعمل فرق واضح فى منطقة ما حول العين ، بإختصار شديد هوه بيرطب ، بيغذى وبينعم منطقة تحت العين ، وصحيح إنه مش بيقضى على الهالات ولكن مع الإستخدام المنتظم لمدة شهر على الأقل بيفتحها نسبياً ، بشكل عام منتج مميز جداً من أوريفلام ، الملحوظة الوحيدة إنه غير مناسب للبشرة الدهنية لأنه غنى جداً بالزيوت.

5. Tender Care .. Code "1276" :-

المنتج الأكثر شعبية فى أوريفلام على الإطلاق ، بستخدمه فى روتينى اليومى للعناية بالبشرة والجسم على حد سواء ، بما إن الموضوع بيتكلم عن الشرة فهخصص الكلام هنا عن البشرة ، بستخدمه كمرطب للشفايف وبحس بتأثيره بعد أقل من ساعة من إستخدامه ، بفضل إستخدامه قبل النوم مباشرة عشان يتفاعل لأطول فترة ممكنة مع بشرتى طول الليل ، اوريفلام كل موسم بتنزل منه روائح مختلفة زى الكرز والشيكولاتة والعنب وغيره ، كلهم ليهم نفس التأثير على البشرة ولكن لكِ الحرية فى إختيار رائحتك المفضلة.

6. Pure Nature Tea Tree & Rosemary Cleansing Wipes .. Code "24913" :-

همممم ، منتجات كتير من مجموعات بيور ناتيور ! أعتقد إن دى حاجة كويسة ، دى أول مناديل للبشرة تصدرها شركة اوريفليم ، حبيت أجربها وبعد أول إستخدام أدمنتها ، ريحتها جميلة ومنعشة .. بتشيل الميكب كويس جداً بس طبعا متغنيش عن الغسول بعدها ، مناسبة جداً لكل أنواع البشرة خاصة الدهنية بس غير مناسبة فقط للبشرة الحساسة ، اللى لفت نظرى إنها لفترة محدودة ! وده اللى مفهمتوش ، مجموعة شجرة الشاى والروز مارى من أكثر المجموعات مبيعاً فى أوريفلام وأقدمها ، ومفيش منتج مماثل ليه فى الشركة فليه يكون لفترة محدودوة ؟ أقترح إنه يصبح منتج دائم وهيحقق منفعة مزدوجة لكل من الشركة وعملائها ، بحب آخدها معايا فى السفر والرحلات والمصيف وخلافه بتكون عملية جداً ومناسبة ، عددهم 25 منديل.

7. Hydra Optimum Headband .. Code :10354" :-

فيه بنات كتير ممكن يشوفوه فى الكتالوج على إنه منتج أى كلام وميلفتش نظرهم على الإطلاق ، لكن على العكس تماماً ده Must Have ! بيحمى الشعر بفاعلية لما تكونى بتستخدمى ماسك على بشرتك أو بتحطى الميكب أو بتشيليه ، الحاجة الوحيدة اللى مش عاجبانى فيها هى إن حجمها صغير بس ده يعوضه إنها بتأدى دورها بفاعلية رغم الحجم الصغير.

كده أنا انتهيت من 7 منتجات من أصل 10 المفروض يتضمنهم الموضوع .. لو الموضوع عجبكم وحابين إنى أكمله سيبولى تعليق ، لو كان فيه تفاعل وعجبكم الموضوع ،

بإذن الله هكمله ولو عندكم أى مقترحات تانية لمواضيع تهمكم قولولى وأنا بإذن الله هعملها ، متنسوش تتابعوا بقية مواضيع المدونة والمتعلقة كلها بأوريفلام.

The"10" Must Haves from Oriflame "Makeup" .. 10 منتجات لابد من شرائها من أوريفلام "مكياج"

بسم الله الرحمن الرحيم

حبيت إنى أبدأ أول موضوع فى المدونة بال "Must Have" أو المنتجات اللى من الضرورى إنها تكون عندك من أوريفلام ، أعتقد إن دى أهم حاجة المفروض إن أى حد يعرفها لو قرر إنه يشترى من شركة معينة.

عادة الناس بترتبك أمام تعدد المنتجات ، بيكونوا حابين إنهم يشتروا الأفضل من أول مرة ، ومع عدم توافر عينات كافية من كل المنتجات فى أوريفلام فأنا هساعدكم فى الموضوع ده والمواضيع التالية بإذن الله على إختيار المنتج المناسب لإحتياجاتكم.

النهاردة أول موضوع هيكون عن المنتجات الضرورى شرائها من "المكياج" من أوريفليم.

1. Oriflame Beauty Eyebrow Kit .. Code "21241" :-

علبة الحواجب دى ضرورية لكل بنت ، سواء كانت بتحب شكل الحواجب طبيعى أو كثيفة ، العلبة بتحتوى على لونين بنى متوسط وبنى وغامق وواكس وفرشتين صغيرين ، بتختارى اللون المناسب ليكى فى اللونين وممكن تخلطى اللونين لو إنتى عايزة درجة متوسطة بينهم وبتفردى بالفرشاة السوداء على الحاجب بالكامل أو على الأجزاء اللى فها شعر خفيف وفراغات ، بعد ماتنتهى من رسم الحاجب تستخدمى الفرشاة البيضاء فى وضع طبقة خفيفة من الواكس على الحاجب بالكامل لتثبيت الشعر فى مكانه واللون ، رسمة الحواجب بتفضل معاكى طول اليوم حتى مع الحر والرطوبة ، العبوة حجمها 3 جرام بس بتقعد معاكى سنتين تقريباً مع الإستخدام اليومى ، يعنى رائعة من كل الإتجاهات ، الصورة المرفقة الألوان من الشمال الدرجة الأفتح واللى فى المنتصف الغامقة والدرجة اللى عاليمين دى مزيج اللونين مع بعض.

2. Giordani Gold Make-up Base .. Code "22760" :-

أساس جيوردانى ليه فاعلية مزدوجة .. ممكن تستخدميه لوحده كبديل لكريم الأساس وممكن تستخدمه كطبقة أساسية قبل كريم الأساس ، لو إستخدمتيه لوحده ممكن تستخدميه مع كونسيلر وبودرة وجلوس وكده ده لوك مناسب جداً لفترة الصباح ، وبالليل ممكن تستخدميه قبل كريم الأساس لو إنتى رايحة مناسبة أو هتفضلى بالمكياج لعدد طويل من الساعات ، الكريم نفسه غنى جداً يعنى مش هتحتاجى لكمية كبيرة فى الإستخدام مع العلم إن حجم العبوة 30 مل يعنى هتعيش معاكى فترة طويلة ، ملمسه ناعم جداً على البشرة وريحته جميلة جداً ، بيندمج مع لون بشرتك أياً ما كان لونها وبيديلها لمعة جميلة ، بينور بشرتك سواء إستخدمتيه مع أو بدون كريم الأساس ، وطبعاً 

ممكن تستخدميه مع أى كريم أساس مش شرط كريم أساس جيوردانى.

3. Oriflame Beauty Studio Artist Gel Liner .. Code "26531" :-

شخصياً بفضل الجيل لاينر عن اللاينر السائل أو القلم ، بيكون طرى جداً على العين على عكس القلم وكمان أسهل فى التحكم عن اللاينر السائل ، لو إنتى جديدة فى إستخدام الآى لاينر ساعتها هتحتاجى تتدربى عليه لفترة لحد ماتعرفى تمسكى فرشته وترسمى بيها كويس ، حجمه 3 جرام وزى معظم منتجات الميكب هيقعد معاكى سنتين أو أكتر حسب إستخدامك ، هتحتاجى كمية قلية جداً على الفرشاة بتاعته اللى بتكون موجودة معاه فى نفس العلبة ، تقدرى تتحكمى فى سمك الخط اللى إنتى عايزاه عن طريق إنك تستخدمى طرف الفرشاة فقط أو الفرشاة بالكامل للحصول على خط أعرض.

4. Oriflame Beauty Kajal Eye Liner .. Code "17473" :-

أجمل قلم كحل إستخدمته فى أوريفلام على الإطلاق ، سواده رهيب وثابت لساعات طويلة ، شكله شيك وحجمه 2.5 جرام وبيقعد لمدة سنة ولكن يفضل إستخدامه خلال 6 شهور من فتحه عشان مايجفش ، مناسب للإستخدام داخل وخارج العين ، بعد عدة مرات إستخدام السن بيتخن ، ساعتها تقدرى تستخدميه عن طريق فرشاة الآى لاينر بتاعتك ، والصورة موضحة درجة سواده.

5. Oriflame Beauty Studio Artist Concealer .. Code "23051,23052,23053" :-

أنا جربت أنواع كتير من الكونسيلر فى أوريفلام ، وفكل مرة كنت برجع لكونسيلر ستوديو أرتيست ، ناعم جداً وسهل فى الفرد والدمج ، أنا بستخدم منه أفتح درجة اللايت لكن هوه متوفر بثلاثة درجات تقدرى تختارى منهم الأنسب لكى ، كمية قليلة جداً منه كافية لتغطية الهالات السوداء وأى عيوب تانة فى البشرة ، تغطته متوسطة ومناسب للإستخدام اليومى ، العبوة حجمها 10 مل وتقريباً بتقعد معاكى سنة.

6. Giordani Gold Bronzing Pearls .. Code "21632,21633,24160,23763" :-

أعتقد إن كل عضوة فى أوريفليم إشترت المنتج ده ، على الأقل جربت منه درجة واحدة ، كرات اللؤلؤ ليها شعبية كبير جداً فى أريفلام حول العالم مش بس فى مصر ، حتى إن اوريفليم كل موسم بتنزل منها درجة جديدة أو شكل جديد أو عبوة إحتفالات وخلافه ، مناسبة للإستخدام لتحديد الوجه أو حتى كأحمر خدود ، فيها لمعة رائعة عشان كده بحسها مناسبة أكتر لفصل الصيف ، العبوة 25 جرام وعمرى مابقدر أخلصها ، لولا تاريخ الصلاحية كان زمانى بستخدم كل العبوات اللى إشترتها من المنتج ده ، أكثر من رائع وضرورى لكل بنت وسيدة.

7. Oriflame Beauty Smoky Collection Eye Shadow Trio - Smoky Brown .. Code "18342" :-

دى أكتر علبة آى شادو بعشقها فى اوريفليم ، مناسبة لكل ألوان البشرة من الشقراء للغامقة ، بستخدمها بشكل يومى ، مكونة من 3 ألوان .. بيج فاتح ، بنى متوسط وبنى غامق ، ممكن تدمجى الدرجات كمان مع بعض وممكن تدمجى أى لون منهم مع أى لون تانى من خارج المجموعة ، الألوان مصطبغة وسهلة فى الإستخدام والفرد ، لازم تكون فى مجموعة المكياج الخاصة بأى بنت ، والصورة المرفقة موضحة درجات الألوان التلاتة.

كده أنا انتهيت من 7 منتجات من أصل 10 المفروض يتضمنهم الموضوع .. لو الموضوع عجبكم وحابين إنى أكمله سيبولى تعليق ، لو كان فيه تفاعل وعجبكم الموضوع بإذن الله هكمله ولو عندكم أى مقترحات تانية لمواضيع تهمكم قولولى وأنا بإذن الله هعملها ، متنسوش تتابعوا بقية مواضيع المدونة والمتعلقة كلها بأوريفلام.